Seint peter seide, "cum forth with me : to him ichulle þe lede.
Ake ne beo þov nouȝt a-knowe to him : erore þane ich þe rede."
Line 178
he nam þis wommane bi þe hond : and to hire sone hire brouȝte.
Þo seint Clement i-saiȝ him lede ane womman : vuel bi him he þouȝte,
And seide, "nouþe In þine olde liue : woltþou with wommane beo?"
So wroth he was þat vnneþe he wolde : toward him bi-seo.
Line 182
¶ Þis guode wijf stod bi hire sone : heo ne miȝte for-bere non-more,
heo bi-cluppte him faste and custe a-non : for Ioye heo weop ful sore.
hire hondene þat hire weren bi-nome : anon-riȝt hole huy were,
For Ioye, and for grete vertue : of þe holie men þere.
Line 186
SEint Clement was wroth with hire : for heo bi-clupte him and custe, [MS. clupte]
And in grete wrathþe hire pulte a-wei : and to þe grounde upriȝt þruste.
"Clement," seide seint peter þo : "darstþov þine moder pulte?
Þov cri hire Merci and lat þe schriue : for þine foule gulte!"
Line 190
"Louerd," seide seint cleme[n]t [þo] : "ȝweþur þis mi moder beo?
Louerd, i-hered beo þi miȝte : þat ich moste þis day i-seo!"
To is moder he ful a-doun : and bi-clupte hire and custe.
Welle, þe Ioye þat þare was : þo eiþur of oþur wuste!
Line 194
Þis wyf seide, "leoue sone, þin ore : ȝweþur þi fader a-liue beo?"
"Certes, moder," he seide, "i-not : Ine wene neuer-eft him i-seo.
Twenti ȝer it is ago : þat he After þe i-wende,
Line 197
Þat neuer-eft Ine heorde word of him : ne he ne cam ne sende."
Þis guode wyf bi-gan to weope sore : ake natheles for blisse
Of hire sone þat heo hadde I-founde : hire seoruwe heo gan to lisse.
Euere stoden bi seint peter : his oþere desciples tweie
Line 201
Þat fram symon Magus weren i-come to him : and ȝeorne bi|heolden beie;
huy i-heorden hou þis guode wyf tolde : to clemente, hire sone, þere, [folio 143b]
hov hire tweie leoue sones : in þe se a-dreinte were.
Line 204
Þo huy hadden þis tale i-heord : huy weren swiþe glad,
For Ioye huy stoden ase þei huy weren : witlese oþur [orig.and] a-mad.
