So þat heo bi-lefte þare : In wonder cas I-novȝ,
For-to it was on oþur ȝer : þat þe .se. hire with-drouȝ;
And hadde child þare In þe .se. : and at þe ȝeres ende
hol and sound with hire childe : þudere heo gan i-wiende— [folio 134]
Line 148
I-saued heo was in þe deope .se. : þoruȝ þe grace of seint Miȝhel.
For-soþe, nis nouþe no man aliue : þat hire couþe habbe i-wust so wel,
Ne so hire i-fed and hire child : þat ne costnede nouȝt a stravȝ:
For þei heo hadde fisch and drinke : ȝe wuten wel it was ravȝ.
Line 152
And so to floteri in þe grete .se! : wounder, þat heo nadde i-beo ded.
Seint Miȝhel was a guod wardein : ȝwane we habbeth al i-sed;
Icholde ech man me hadde ane peny i-ȝyue : þat no couþe nouȝt witen hire so!
Atþe feste-day at þe hul of Toumbe : þis dede was i-do.—
Line 156
þe hul of Toumbe he is i-cleoped : for he is sumdel [MS. sundel] nare
And long, ase Man may i-seo : ane Mannes burieles fare
þat mannes bodi is Inne I-leid : ȝwane huy beoth here dede;
Also þilke hul is long : and nouȝt wel large In brede.
Line 160
And þat is, ase þe .se. hath i-bete : faste on eiþur side
And hath þat sond a-rerd up on heiȝ : þat men mouwen i-seo wel wide,
And þar-of Imaket ane hul : narv and long i-wis;
More þane four hondret fet : þe hul so heiȝ is.—
Line 164
MEn synguez a-Miȝheles-masse-day : In holie churche also
Of one bataile þat seint Miȝhel : with a dragun scholde do:
þat was þe luþere lucifer : þo he was [al. þat was] is felawe
And sumdel is souerein : for-to he gan mis-drawe,
Line 168
Ake þo he þat Aungel was : þoruȝ is wicke pruyte
Bi-cam to a luþer feond— : he bi-ȝat þare-with luyte!
he feol out of is heiȝe sege : þat he ches a-mis,
To þe deope putte of helle : þare is wonijngue is.
Line 172
fram þe hexte stude þat is : with one swenge he cam
To þe loweste stude, i-wis— : ane wonder wei he nam!
Nov sori beo he! ȝwat was him? : ȝwi ferde þe schrewe so?
he pleyde with þe fallingue tourn : so wel he couþe hine do,
Line 176
Iaumbe leue he cam swenge : Into helle grounde.
A muregore In he hadde bi-fore : þat worse þare he founde!
A wonder sweng, me þinchez, he made! : his bi-ȝete was ful luyte;
