Þat folk þat hire louede : siwede hire wel faste,
hire bodi heo nomen with gret honour : and bureden it atþe laste.
Line 108
Þo heo bureden þat holi bodi : a felawe-schipe þare cam go
Of þe faireste children þat miȝten beo : þre hondret and wel mo,
Ȝonge þingus of on age : in ȝwite cloþus of palle;
Ane table of Marbre In is hond : þe on bar at-fore heom alle:
Line 112
¶ heo Ioyneden it to seinte Agace toumbe : þo heo comen þer-to,
Wel sweteliche heo wenden aȝen : þo heo hadden so i-do—
Angles it weren þat þare a-liȝten : for seinte Agace to grounde.
Clerkes bi-heolden þe table ȝeorne : þare-Inne i-write huy founde:
Line 116
"Þis Maide hadde holi þouȝt : god heo dude honour,
A-serued heo hath to alle þe contreie : deliueraunce of langour."
For-soþe heo miȝten þis laste word : þar-after onder-stonde:
þulke time a twelf-Monþe : of an hul in þe londe
Line 120
Strong fuyr þare cam eornen out : ase water doth of welle,
And barnde al þat þare was a-boute : quic þing it gan a-quelle;
hit spradde wide into al þat lond : þat folk hadde grete fere,
And barnde þe hard roche of ston : ase þei it Col were.
Line 124
heo ne dorsten bi-leue at no toun : ake ornen ase men þat were wode:
At seinte Agace Toumbe : þare heo formest at-stode.
Al-so it bi-feol in hire daye : ase sone ase heo weren þere,
Þat fuyr queinte a-non in-to al þat lond : ase þei it neuere nere; [folio 96]
Line 128
And bi-fore it hadde six dawes i-last : and six Nijȝt al-so,
And orn ase þei it water were : for-barnde al þat him cam to.
Þo schewede ore louerd þat it was soth : þat þe maide seinte Agas
A-seruede deliueraunce to al þe Contree— : þare wel i-sene it was.
Al-so w[i]sliche we schullen hire bidde : ase heo þe contreie ȝaf bote,
Þat we to þe Ioye þare heo is Inne : with hire come we mote.
34 [Scholace]
SEinte scholace, þat holie mayde : heo was of clene liue,
Leouere heo hadde to beon Nonne : þane beon i-widdet to wiue.
Seint Beneit hire broþer was : and þe Ordre furst bi-fond
Of Nonnes and of blake Monekus : þat is ȝuyt into al þat lond;
Line 4
Of blake Monekus at Duyn : An Abbeye he let a-rere,
him-sulf þe Abite furst he nam : þe ȝongore for-to lere.
