'ffor your pleasure we shall repente it sore.'
Line 2769
'ffor hym [? myn.] ,' quod he, 'now good tell me wherefore.'
'yes yes,' quod he, 'this is the case,
your Iee is euer stedfast in on place.'
Line 2772
'What place is that?' [quod he] 'I prae yow saye;
As for the kyng, I see hym nott I wise.'
'I mene not that,' quod Darell, 'be this daye,
It is another thing, so haue I blis. [folio 15a]
Line 2776
On yender towre on highe I see where is
That causith yow these mastereys for to shewe,
Now haue I told yow all with wordes fewe.'
Line 2779
'In sothe,' quod he, 'ye bere me wrong in hand,
Line 2780
ffor certenly I saugh hir not to nowe;
Sithe she is ther, as now I vnderstonde,
If I do wele she woll me more allowe.
Line 2783
Now be not wroth, for by licence of yow
Yet onys I will assaye what I canne do.'
'I graunt,' quod Darell, 'late vs goo thertoo.'
Line 2786
Generides, and with hym ser Darell,
Line 2787
Bothe on thei rode to knowe what was ther vre;
And with Generides was Natanell,
Beryng a spere of tymber good and sure;
Line 2790
Generides ther mette att a venture
The kyng Ruben, Redy with spere and sheld,
And ther they strake to geder in the feld.
Line 2793
Vppon the sheld he strake Generides,
Line 2794
And ther with brake his sheld in pecis twayn:
A mighty man he was, butt neuer the lesse
Atte same course he smote hym so ayeyn,
Line 2797
That of his hors he felle vppon the playn,
With that Generides both fair and wele
his hors he delyuered on to Natanell.
Line 2800
