¶ In foure pecis þai hit smate,
of þe quiche got hit wate;
þai did riȝt with ij. as god ment,
til rome and alisaundre ham sent;
Line 248
þe þrid þai left in þat cité,
as in stede of auctorité;
þe firþ led hir wiþ eline
vn-to hir sone king costantine;
Line 252
to mete hir ȝode mani baroun,
wiþ grete and faire processioun;
wiþ-in þe kirke of saint sophie
þer haue þai sette hit richelie;
Line 256
was neuer ȝet na tree in lande
sa riche ne sa faire shewande;
Men was wonte to come to se
at ilke paskis þat hali tree.
Line 260
daies iiij. ham sette for stage
þe emperour wiþ his baronage,
¶ a-pon þe day of mandee;
þe riche quene wiþ hir meyne,
Line 264
a-pon þe friday efterwarde [MS. ofter|warde.] ,
of pardoun for to serue hir part;
þe clergi on þe seterday,
þat kepers ware of cristen lay;
Line 268
wiþ-outen case þer daies þre
þis cros was þen, and man mote se;
¶ and hit was talde of mani man,
at a licour þer-of ranne,
Line 272
þat wiþ betinge was bote of bale,
and sekenes diuers to make ham hale;
a vessel, þat hit ware noȝt tint,
stode vnder þat licour for to hint,
Line 276
for to dele vn-to þe vnfere,
to sende ouer al þe cuntree sere.
ÞE grace of god is grete and gode,
þat giuis vs ensaumple of þe rode;
Line 280
