I shall haue my will to-day
Of that I haue longid aye.
Certeis, thyn hed here will I of smyte,
And bere hit to the mayde also tyte.
Line 8485
Now shall thow well vndyrstond
That I wold not for all this lond
Onys to let the drynke all thi fyll:
Then myȝt I hope te sped full yll.'
'Kyng of heven,' quod sir Gye,
Line 8490
'But I drynke shortly I dye.'
He hath thouȝt for all hys saw
To wend and drynke a litill thraw.
He toke his cours & Ran full ryȝt:
Drynke he muste, or fall down tyght.
Line 8495
Ameraunt gan faste after to goo
With hys swerd hym for to sloo.
Gye stert in-to the water depe:
But Iesu cryste hym ther did kepe, [Caius MS. 107 page 185]
Out of the water shall he not wyn:
Line 8500
He was nere-hand a-drownyd theryn.
Now ys Gye in a stronge case:
The water ouer hys gyrdyll was.
Hys hed he smote depe down:
The water was ouer hys crown.
Line 8505
Ameraund smote at hym so wele,
That in the water he made hym knele.
The water hym closyd all abowte:
He held hym in, he myght not oute.
When sir Gye had dronke I-nough
Line 8510
He thankyd god, and faste he lough.
Vp he sterte as knyȝt full stoute:
