That owte of Gye tell can.
Now I come heder this ilke daye,
And reste me here be the weye.
Hit is twelmonythis and more
Line 7865
Sythen that I fro the kynge gan fare.
Now wyll I wende to hym a-geyne:
Well I wote I shall be slayne;
But for the deth wyll I not flee [Caius MS. 107 page 164]
To yeve answere how it bee,
Line 7870
For I haue hym my trowth plyght
To com a-geyne to hym full ryght.
Well I wote I shall be dede
And also my sonnes with-owte rede.
Of my selfe yeve I nought,
Line 7875
But of my sonnes is all my thought;
For they be knyghtis bold and wyght,
And well assayd in meny a fyght.
Yf they myght leve and old men bee,
They myght much helpe crystiante.
Line 7880
Now to hym wyll I fare,
And take the deth with hem thare.'
With that he sowned be-fore sir Gye;
Therfor he was full sorye.
Gye had sorrow and much care,
Line 7885
For he saw Ionas so fare.
'Leefe pilgrym,' quod sir Gye,
'For thy sonnes thow arte sorye:
Gye and herrawd hast thow sowght
In meny londys, and foundyst hem nought.
Line 7890
Thought thow make doel hit is no ferlye,
When thow ne foundyst nother herraud ne Gye:
Thorough hem thow hopedist to delyuerd be
Of prison and thi chyldre free.
