With that either of theim pricked his stede,
Line 2085
And in grete wrathe to-gider yede.
Otes smote Guy in the sheelde,
That euen half flowe in the felde,
And Guy gaue Otes a wounde:
Thurgh his theighe he thruste his swerde grounde,
Line 2090
And his hede he had him benome,
Had not grete socour to him the rather come.
Two hundred knyghtes assailled Guy, [Caius MS. 107 page 66]
And him wolde haue sleyn wilfully,
And he him defended as a man:
Line 2095
All that he smote woo theim beecam.
There they haue their lorde redde,
And all wounded oute of the place ledde.
Guy the Almaignes before him wreketh:
Many he taketh, and many he sleeth.
Line 2100
Guy theim driueth, and fast they flee,
As folke that greuously ouerecome bee.
WITH THAT come the Duke Reyner,
And the Constable sir Gaudemer:
In a slade they metten Guy,
Line 2105
And strongly on him sette they;
And Guy him drowe toward the Roume,
And all his felawes that with him come;
For ther were a thousand knyghtes
With theim to mete anone Rightes.
Line 2110
'Lordinges,' quoth Guy, 'herken to me:
Thise knyghtis bee comyng as ye may see,
The Duke Reyner of Cessoigne
And the Duke Gaudemer of Coloigne.
In euery side we bee-sette bee,
Line 2115
So that we may not hense flee;
And though we might y nelle;
For forsothe, y shall you telle,
Better it is to dye manly
Than to flee with shame and vilanye.'
Line 2120
