[6-text p 675] seint Austine. þat suche schamefast folke bien next for-ȝeuenesse & remission [988] ¶ þat oþere signe is humilite of confessione; of whiche seiþe seint Petre. Vmbleþ ȝow vnder þe miht of of god; ¶ þe honde of god is myhti in confession; For þereby god fo[r]ȝeueþ þe sinnes; for he alon haþ þe powere; [989] & þis humylite schal be in herte & in signe outewarde; For riht as he haþ humylite to god in his herte. Riht so schold he humblen his body outwarde to þe preste þat sitteþ in [folio 252b] goddes place; [990] for whiche in no maner seþen þat crist is souereigne; & þe preste mene & mediatour be tuex criste & þe sinner; And þe sinner is þe last be weie of resoun; [991] þan scholde not þe sinner sitte also hihe as his confessour bot knele be-forne him or att his fete bot if malady distourbe it; for he schal not take kepe who sitteþ þere bot in wos place þat he sitteþ; [992] ¶ A man þat haþ trespassed to alorde & commeþe to axe mercye; & maken his accorde & sitte him doune anone by þe lorde; men wolde holde him outrageous & nouht worþi so sone to haue remissione ne mercye; [993] ¶ þe .iij. signe is þat þi schrift scholde be ful of teres if man may wepe; And if man maie not wepe wiþ his bodely eyȝen lat him wepe in his herte; [994] Suche was þe confessione of seinte Peter; ffor after þat he hadde for saake ihesu criste he went oute & weppet ful bitterly; [995] ¶ þe; iiij. signe is þat he let not for his schame to schewe his confessione. [996] Suche was þe confession of þe Magdaleyn for sche spared for no schame of hem þat weren att þe fest for to go to oure lorde ihesu criste; & be-knowe to him hire sinne [997] ¶ þe .v.te signe þat aman or womman be obeisant to receyue þe penance þat is him enioynede; ¶ For certes ihesu criste for þe giltes of o man was obediente to þe deþe
[998] ¶ þe secunde condicion of verreye confessi[on] is þat it be hastily done; For certes if aman had a dedly wounde euer þe langer þat he tarieþ to warische
