[6-text p 188]
¶ Vpon þis bere ay lyeþ þis Innocent
Be-forne þe chief autter whiles Masse last
And after þat þe Abbot wiþ his Couent
Hadde spedde hem for to burye him fast
Line 1828
And whan þei haly water on him cast
And ȝit spakke þe childe whan spreynt was þe holy water
And songe O alma redemptoris mater
Line 1831
¶ This Abbot whiche þat was an holy man
As monkes be or elles ouhten to bee
Þis ȝonge childe to coniure he gan
And seide o dere childe .I. hailese þe
Line 1835
Be vertue of þe holy Trinite
Tel me what is þi cause for to singe
Sethen þi þrote is kette att myn semeinge
Line 1838
¶ My þrot is cutte vnto my nekke bone
Saide þis childe and as be waie of kinde
.I. scholde haue deyed longe time agone
Bott ihesu criste as ȝe in bokes finde
Line 1842
Wil þat his glori last and bue in mynde
And for worschipe of his moder dere
Ȝette may .I. singe O Alma loude and cle[re]
Line 1845
¶ This wel of Mercie cristes moder swete
.I. loued alweie as after my coninge
And whan þat .I. my lif scholde lete
To me sche camme and badd me for to singe
Line 1849
Þis Antime verrely in my mynde deynge
As ȝe haue herd and whan þat .I. had songe
Me þouht sche laide a greyne vpon my tonge
Line 1852
¶ Wher-for .I. saie and singe most certeigne
In honour of cristes moder fre
Til of my tonge of taken is þe greyne
And after þat seide sche þus to me
Line 1856
