[6-text p 546]
(76)
þree strokes in þe nekke he smote hir þo
Line 526
The tormentour bot for no maner chaunce
He myhte nouhte smyte al here nek y tuo
And for þere was þat time an ordinance
Line 529
That no man schold do to man suche penance
The ferþe stroke to smyten soft or sore
þis tormentour ne dorste no more
Line 532
(77)
Bot half dede wiþ hire nek y-coruen þere
Line 533
He left hire lye and in his weie he wente
The cristen folke whiche abowten hire were
Wiþ schetes home ful feire here hente
Line 536
þree daies leued sche in þis torment
And neuer cesed hem þe feiþe to teche
þat sche had fostred hame sche gan to preche
Line 539
(78)
And hem sche ȝaue here mebles and her þinge
Line 540
And to þe Pope vrban be-toke hem þo
And seide þus axed þis of heuen kinge
To haue respite þrei daies and no mo
Line 543
To recommande to ȝowe er þat .I. go
þes sowles loo and þat .I. miht do wirche
Here of myne house perpetuelly a cherche
Line 546
(79)
Seint vrban wiþ his dekenes priuelye
Line 547
The lady fette and beried it be nyht
Amonge his oþere seintes honestly
Here house þe cherche of seinte cecely hiht
Line 550
Seinte vrban halowed it as he wel myht
In þe whiche in to þis daie in noble wise
Men done to criste and to his seintes seruise.
Line 553
Explicit vita sancte Cecilie.
