[6-text p 414]
¶ No wonder is þouhe þat sche were a-stoned
Line 337
To se so grete a geste in þat place
Sche neuer was to suche gestez woned
For which sche lokede wiþ ful pale face
Line 340
Bot schortly forþe þis matie[r] for to chace
Thes aren þe wordes þat Markes seide
To his benigne feiþ-ful maide
Line 343
¶ Crizild he seide ȝe schal wele vnderstonde
Line 344
It likeþ to ȝoure fader and to me
Þat .I. ȝowe wedde and eke it maie so stonde
As .I. suppose ȝe wil þat it so be
Line 347
Bot þis demandes ax .I. first quod he.
That seþen it schal be done in hastie wise [folio 118b]
Wil ȝe assent or elles ȝowe avise
Line 350
¶ I seie þis be redye wiþ goode herte
Line 351
To al my lust and þat I. frely maie
As me best þenkeþ do ȝowe knowe ore smerte
And neuer þe to grucche it nyht ne daie
Line 354
And eke whan .I. seie ȝe ne saie nouht naie
Neyþer be worde ne be frounynge contenance
Swere þis and here .I. swere oure alliance
Line 357
¶ Weddinge vpon þis worde whakeinge for drede
Line 358
Sche seide lorde vndigne or vnworþi
Am .I. to þat ilke honor þat ȝe me bede
Bot as ȝe wil ȝoure self riht so wil .I.
Line 361
And here .I. swere þat neuer wilingely
In werke ne þouhte .I. nyl ȝowe disobeie
For to be dede þouhe me were loþe to deie
Line 364
¶ This is ynouhe Crizilda myne quod he
Line 365
And forþe he goþe wiþe a ful sobre chiere
Oute atte þe dore and after þat cam sche
And to þe peple he seide in þis maniere
Line 368
