[6-text p 339]
Abide quod sche Mi tale is nouȝt be-gonne
Nay þou schalt drinken of a noþere tonne
Are þat .I. go schal sauere wers þan ale
And whan þat .I. haue tolde forþe my tale
Line 172
Of tribulacione in mariage
Of whiche .I. am experte in myne age
This is to seye Mi-self haþ be þe whippe
þan maist þou chese weder þou wilt scippe
Line 176
Thilke tonne þat .I. schal a-broche [folio 89b]
Be ware of it er þou to nyhe aproche
For [I] schal tell ensamples mo þan tenne
Wo so þat wil be war of oþere menne
Line 180
Be him schal oþer men correct be
þis same wordes writeþe tholome
Ride in his almagist and take it þere
Dame .I. praye ȝowe if ȝoure wil were
Line 184
Said þis pardoner as ȝe began
Tel forþ ȝowre tale spare for no man
And teche vs ȝonge men of ȝoure practike
Gladly quod sche if it maie ȝowe like
Line 188
Bot þat .I. praie to al þis compaignye
If þat .I. speke after my fantasie
As takeþe not a greue of þat .I. saie
For myne entent is nouht bot for to pleie
Line 192
Nowe sires þan schal .I. tel ȝowe my tale
As euere most .I. drink wyne or ale
.I. schal seie soþe þe husbondes þat I. had
As þre of hem were riht good and tuo were badde
Line 196
The þre were godemen and riche and olde
Vnneþ myht þei þe state holde
In whiche þei were bounden vnto me
Ȝe wote wele what .I. mene of þis parde
Line 200
As god me help .I. lauhe whan .I. þinke
Howe pytously a nyht .I. maade hem swynke
Bot be me feie .I. told of hit no store
þei hadde me ȝeue hir londe and here tresore
Line 204
