Incipit fabula. [on leaf 79]
Att Sarray in þe londe o Tartary .
Ther dwelled a kinge þat werred Russy
þoruhe whiche þere deyed mony a douhti man .
þis nobil kinge was cleped Kambynskan
Line 12
Whiche of his time whas of so grete renone
Thar þere nas nouhewere in no Regione
So excellent a lorde in al þinge
Him lakked nouh þat longed to a kenge
Line 16
As of þe secte of whiche þat he was borne [folio 79b]
He kepped his laye to whiche þat he was sworne
And þer-to he was harde wise and riche
And pytous and Iuste alwaie ylyche
Line 20
Soþe of his worde benigne and honurable
Of his corage as any Centre stable [.i. centrum celi.]
Ȝonge fressche and stronge in armes desirous [[or circuli.]]
As any bachillier of al his house
Line 24
A faire person he was and fortunate
And kepped alwaie so wele roiale astate
Þat þer nas nouhewhere suche a man
þis noble kinge þis tartaryn Cambynskan
Line 28
Had tuo sonnes on Eltheta his wif
Of whiche þe eldest hiht Algarsif
The toþer was cleped Camballo
A douhte had þis worþi kinge also
Line 32
Þat ȝongest was and hiht Canace
Bot for to tell ȝowe al hir beaute
It liþe nouht in my tunge ne in myne sowneinge
.I. dar nouht vnder-tak so hihe a þinge
Line 36
