The Corpus ms (Corpus Christi coll., Oxford) of Chaucer's Canterbury tales. Ed. by Frederick J. Furnivall.

                                
                                  That he nys cladde and redy for to ride
                                
                                  Wiþ hunte and horn and houndes him besyde
                                
                                  ffor in his huntyng haþ he such delit
                                
                                  That it is all his ioye and appetyt
                                  Line 1680 
                                
                                  To ben himself þe grete hertes bane
                                
                                  ffor after mars he serueth now Diane
                                
                                  Cler was þe day as I haue told er þis
                                
                                  And Theseus with alle ioye and blys
                                  Line 1684 
                                
                                  With his ypolita þe faire queene
                                
                                  And Emelye cloþed al in greene
                                
                                  On huntyng ben þei riden really
                                
                                  And to þe groue þat stood ful faste by
                                  Line 1688 
                                
                                  In which þer was an hert as men him tolde
                                
                                  Duk Theseus þe streighte wey haþ holde / [folio 24b] 
                                
                                  And to þe lannde he rideþ him ful righte
                                
                                  ffor þider was þe hert wont to haue his flighte
                                  Line 1692 
                                
                                  And ouer a brook and so forþ on his wey
                                
                                  This Duk wol haue a cours at him or twey
                                
                                  Wiþ houndes swich as þat him list to comaunde /
                                
                                  And whan þis Duk was come vnto þe launde
                                  Line 1696 
                                
                                  vnder þe sonne he loked and anon
                                
                                  He was war of arcite and Palamon
                                
                                  That foughten breeme as it were boles tuo
                                
                                  The brighte swerdes wenten to and fro
                                  Line 1700 
                                
                                  So hidously þat with þe leste strook
                                
                                  It semeþ þat it wolde felle an ook
                                
                                  But what þei were noþing he ne woot
                                
                                  This duk his courser with his spores smot
                                  Line 1704 
                                
                                  And at a stert he was betwixe hem tuo
                                
                                  And pulled out a swerd and cried ho
                                
                                  No more vp peyne of lesyng of ȝour hed
                                
                                  By mighty mars he schal anon be ded
                                  Line 1708 
                                
                                  That smyteth eny strok þat I may seen
                                
                                  But telleþ me what myster men ȝe ben
                                
                                  That ben so hardy for to fighten heere
                                
                                  Wiþoute Iuge or oþer officere

                                  Line 1712

Pages

Index

About this Item

Title: The Corpus ms (Corpus Christi coll., Oxford) of Chaucer's Canterbury tales. Ed. by Frederick J. Furnivall.
Author: Chaucer, Geoffrey, d. 1400.
Canvas: Page 49
Publication: London,: Pub. for the Chaucer society by N. Trübner & co.,; 1868-[1869]

Technical Details

Collection: Corpus of Middle English Prose and Verse
Link to this Item: https://name.umdl.umich.edu/agz8235.0001.001
Link to this scan: https://quod.lib.umich.edu/c/cme/agz8235.0001.001/77:3

Rights and Permissions

The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].

DPLA Rights Statement: No Copyright - United States

IIIF

Manifest: https://quod.lib.umich.edu/cgi/t/text/api/manifest/cme:agz8235.0001.001

Cite this Item

Full citation: "The Corpus ms (Corpus Christi coll., Oxford) of Chaucer's Canterbury tales. Ed. by Frederick J. Furnivall." In the digital collection Corpus of Middle English Prose and Verse. https://name.umdl.umich.edu/agz8235.0001.001. University of Michigan Library Digital Collections. Accessed June 20, 2025.

The Corpus ms (Corpus Christi coll., Oxford) of Chaucer's Canterbury tales. Ed. by Frederick J. Furnivall.

Annotations Tools

Actions

About this Item

Technical Details

Rights and Permissions

Related Links

IIIF

Cite this Item