[6-text p 202] hire wepyng for to stynte [2169] ¶ ffor which resoun þis noble prudence suffred hire housbond for to weepe and crye as for a certeyn space [2170] ¶ And when sche saugh hire tyme sche seyde him in þis wyse ¶ Allas my lord quod sche why make ȝe ȝoure self for to be ylike a fool [2171] ffor soþe it apertyneþ nouȝt to a wise man to maken such a sorwe [2172] ¶ ȝoure doughter wiþ þe grace [folio 218a] of god schal be warisshed and askape [2173] ¶ And alle were it so þat sche right now were deed; ȝe oughte nouȝt as for hire deþ ȝoure self to destryue [2174] ¶ Senek saiþ þe wiseman schal nouȝt take to gret discomfort for þe deþ of his children [2175] but certes he schulde suffre it in pacience as wel as he abydeþ þe deþ of his owen propre persone
[2176] ¶ This Melibeus answerde anon and sayde ¶ What man quod he schulde of his wepyng stynte þat haþ so gret a cause for to weepe [2177] ¶ Ihesus crist oure lord himself wepte for þe deþ of lazarus his freend [2178] ¶ Prudens answerde ¶ certes wel I woot a-tempre weepyng is nouȝt defendid vnto him þat sorwful is among folk in sorwe ¶ But it is raþer y-graunted him to wepe [2179] ¶ The apostel Poule. vnto þe Romayns writeþ. Man schal reioyse wiþ hem þat maken ioye ¶ And weepen wiþ suche folk as wepen [2180] ¶ But þough a-tempre wepynge be y-graunted Outragous weepyng certes is defended [2181] ¶ Mesurable wepyng schulde be considered after þe lore þat techeþ vs Senek [¶ Senek/] [2182] ¶ Whan þat þi freend is deed let nought þin yen to moyste ben of teeres ne to druye ¶ Al þough þe teeres comen of þin eyen let hem nouȝt fallen [2183] ¶ And whan þou hast forgon þi frende I rede þou do þy diligence to gete þe anoþer. and þis is more wiser þan for to wepe for þyn freend þe which þat þou hast lore ¶ ffor þer-in is no boote [2184] ¶ And þerfore if þou lust gouerne þe by Sapience; putte awey sorwe of ȝoure herte. [2185] ¶ Remembreþ ȝou þat Ihesus Cyrak / seiþ [¶ Ihesus Cyrak/]
