[6-text p 197]
In londe
Lo lordes myne heere [[ys, put in by a later hand]] a fytte
If ȝe wole eny more of hitte
To telle it wol I fonde
Line 2080
[Fytte II.]
Now halde ȝoure mouþe par charite
Boþe knight and lady fre
And herkneþ to my spelle
Line 2083
Of bataile and of chiualry
And of ladyes loue drery
Anon I wol ȝou telle
Line 2086
Men speke of Romance of prys
Of horn child and of ypotys
Of Beuys and sire Gy
Line 2089
Of sire libeus and pleyndamour
But sire Thopas he bereþ þe flour
Of real chiualry
Line 2092
his goode steed al he bestrod
And forþ upon his way he glod
As sparcles out of þe bronde
Line 2095
vpon his crest he bar a tour
And þer Inne styked a lily flour
God schilde his corps fro schonde
Line 2098
And for he was a knight aunterous
he nolde slepen in non hous
But liggen in his hood
Line 2101
his brighte helme was his wanger
And by him bayteþ his destrer
Of herbes fyne and goode
Line 2104
