[6-text p 185]
þough þat I for my prymer schal be schent
And schal [be] beten þries in an houre
I wol it konne oure lady to honoure
Line 1733
¶ his felawe taught him homward pryuyly
ffro day to day til he couþe it by roote
And þenne he sang it wel and boldely
ffro word to word acordyng to þe note /
Line 1737
þries on a day it passeþ þurgh his þrote /
To scoleward and homward whan he went
On cristes moder sette was his entent/
Line 1740
As I haue sayde þurghout þe Iewerie
This litel childe as he came to and fro [folio 213a]
fful meryly þen wolde he synge and crye /
On alma redemptoris euermo
Line 1744
The swetnes haþ his herte perced so
Of cristes mooder þat to hure to preye
He can nought stynte of syngynge by þe weye /
Line 1747
¶ Oure firste foo þe serpent Sathanas
That haþ in Iewes his waspes neste
vp swalle and sayde O Ebrayke poeple allas /
Is þis a þing to ȝou þat is honeste /
Line 1751
þat suche a boy schal walken as him leste /
In ȝoure despite and syngen of such sentence
Which is aȝein oure lawes reuerence /
Line 1754
¶ ffro þennes forth þe Iewes han conspired
This Innocent out of þis world to chace
In homicidie þer-to han þey hyred
þat in an aley had a pryue place
Line 1758
And as þe childe gan forby for to pace
þis cursed Iew him hente and heeld faste
And cutte his þrote and in a putte him caste /
Line 1761
