[6-text p 321]
He can no counseil kepe it is no drede
Now kepe ȝou fro þe white and fro þe rede
Namly fro þe white wyn of lepe
þat is to selle in ffischstret or in Chepe /
Line 564
This wyn of Spayne crepeþ subtilly
In oþer wynes growyng faste by
Of which þer ryseþ such fumosite
þat whan a man haþ drunken draughtes þre /
Line 568
And weneþ þat he be at home in chepe
he is in spayne right at þe toune of lepe
Nought at þe Rochel ne at Burdeux toun
And þenne wolen þey sayn Sampsoun Sampsoun
Line 572
But herkneþ lordinges o word I ȝou prey
That all þe souerein actes dar I say
Of victories in þe olde testament
þat þurgh verray god þat is omnipotent
Line 576
Were don in abstinence and in prayere
lokeþ þe bible and þere ȝe may it leere
lokeþ attyla þe grete conquerour
Deyed in his sleepe wiþ schame and dishonour
Line 580
Bledyng ay at his nose in drunkenes
A Capitayne schulde lyue in sobernes /
And ouer al þis avise ȝou right wel
What was comaunded vnto lamuel
Line 584
Nought Samuel but lamuel say I /
Redeþ þe bible and fyndeþ it expressely [folio 199a]
Of wyn ȝeuynge to hem þat han iustice
Nomore of þis for it may wel suffice
Line 588
ANd now þat I haue spoke of glotonye
Now wole I defende ȝou hasardye
hasard is verray mooder of lesynges
And of disceipt cursed forswerynges
Line 592
Blaspheme of crist and mansleynges also
Of batayle of tyme and of oþer mo
It is repreff and contrarie to honour
ffor to be holde a comune hasardour
Line 596
