[6-text p 436]
¶ Grisilde quod he as it were in his play
Line 1030
how likeþ þe my wijf and hire beaute
Right wel quod sche my lord for in good fey
A fairer sawe I neuer non þan sche
Line 1033
I pray to god ȝif ȝou prosperite
And so hope I þat he wil to ȝou sende
Plesaunce ynow vnto ȝour lyues ende
Line 1036
¶ O þing beseke I ȝou and warne also /
Line 1037
þat ȝe prike wiþ no tormentynge
þis tendre mayden as ȝe han do mo
ffor sche is fostred in hire norischinge
Line 1040
more tenderly and to my supposynge
Sche coude nought aduersite endure
As coude a pore fostred creature/
Line 1043
And whan þis walter saugh hir pacience
Line 1044
hire glad cher and no malice at al
And he so often hadde don hire offence
And sche ay sadde and constant as a wal [folio 143a]
Continuyng euere hire Innocence oueral
This sturdy marquys gan hire herte dresse
To rewen on hire wyfly stedfastnesse
Line 1050
¶ This is ynough Grisilde myn quod he
Line 1051
Be now no more agast ne yuel apayed
I haue þy feiþ and þi benignite
As wel as euer womman was assayed
Line 1054
In gret astate and pouereliche arrayed
Now knowe I deere wijf þy stedfastnesse /
And hire in armes toke and gan hire kesse
Line 1057
¶ And sche for wonder took of hit no keepe
Line 1058
Sche þouȝte nought what þing he to hir sayde/
Sche ferde as sche hadde stirte out of hir slepe
Til sche out of hir masednesse abrayde
Line 1061
