[6-text p 164]
I pray ȝou alle my labour to relesse
I may not tellen hir wo vntil to morwe
I am so wery for to speke of hire sorwe
Line 1071
¶ But finally whan þat þe soþe is wist
That Alla gilteles was of hire woo /
I trowe an hundred tymes ben þei kiste
And such a blisse is þer betwixe hem tuo
Line 1075
That saue þe ioye þat lasteth eueremo
Ther is non lik þat ony creature
haþ seyn or schal whil þe world may dure
Line 1078
¶ Tho preyed sche hire housbonde mekely
In relief of hir longe pitous pyne
That he wolde preye hire fader specially
That of his mageste he wolde enclyne
Line 1082
To fouche sauf som day with him to dyne
Sche preyde him eek he scholde by no weye [folio 89a]
vnto hir fader no word of hire seye
Line 1085
¶ Some men wolde sein how þat þe child Maurice
Doþ þis message vntil þis Emperour
But as I gesse Alla was nought so nyce
To him þat was of so souereigne honour
Line 1089
As he þat is of cristene folk þe flour
Sent eny child but it is bet to deme
he went himself and so it may wel seme
Line 1092
¶ This Emperour hath graunted gentily
To come to dyner as he him bysought
And wel redy he lokede bisily
vpon þis child and on his doughter þought
Line 1096
Alla goþ to his In and as him ought
Arrayed for þis feste in euery wise
As ferforth as his konnyng may suffise
Line 1099
