[6-text p 139]
¶ I trowe at Troye whan Purrus brak þe walle
Or ylion þat brende Thebes þat Citee
Not Rome for the harme thurgh hanybal
That Romayns haþ venquissed tymes þre
Line 291
Nas herde such tendre weepyng for pite [folio 78a]
As in þe Chambre for hire departyng
But forþ sche moot wher so sche weepe or syng [¶ Vnde P[t]holomeus libro jo, Capitulo go primi motus celi duo sunt quorum vnus est qui mouet totum semper ab oriente in occidentem vno modo super orbes & cetera. Item aliter vero motus est qui mouet orbem stellarum currencium. Contra motum primum videlicet ab occidente in orientem super alios duos polos & cetera. Omnes enim concordati sunt quod electiones sint debiles nisi in di|uitibus, habent enim isti licet debilitentur eorum electiones radicem .i. natiuitates eorum que confortat omnem planetam debilem in itinere. huc. philosophus.]
Line 294
¶ O ferste moeuyng cruel firmament
Wiþ þy diuinal sweigh that crowdest ay
And hurlest alle fro Est to Occident
That naturelly wolde holde anoþer way
Line 298
Thy crowdyng sett þe heuen in such array
Atte bygynnyng of þis fiers viage
That cruel mars haþ slain þis mariage
Line 301
¶ Infortunat ascendent tortuous
Of which þe lord is helples falle allas
Out of his angle in to þe derkest hous
O. mars .o. ataȝir as in þis cas
Line 305
O fieble moone vnhappy been þy paas
Thou knettest þe þer þou nart nought receyued
There þou were wel fro þens now art þou weyued
Line 308
¶ Imprudent Emperour of Rome allas
Was þer no Philosophre in al þi toun
Is no tyme bet þan oþer in such caas
Of viage is þer non election
Line 312
Namly to folk of heigh condicion
Nat whan a roote is of a burthe y-knowe
Allas ȝe ben to lewed or to slowe
Line 315
¶ The schip is brought þis woful faire mayde
Solempnely wiþ euery circumstance
Now Ihesu crist be with ȝou alle sche sayde
Ther nys nomore but far wel faire Custance
Line 319
