[6-text p 649] [717] ¶ Certis thanne semyth it they schul been turmentid / with the deuyl in helle / but ȝif they doon penytence //
[718] Thanne comyth the synne that men clepyn tarditas as whan a man is so laterede or taryinge / er he wele turne to god / And certis that is a greet folye he is lyk hym that fallyth in the deyth & wil non aryse [719] And this vice comyth of fals hope / that he thynkith that he schal leue longe / but that hope faylith ful ofte
[720] ¶ Thanne lacchesse that is he / whan that he begynnys / ony good werk / Anon he wele forlete it And stynte as doon they that haue ony wight to gouerne / and ne take of hym no moore keep / a non as they fynden ony contrarye or any anoy / [721] these been the newe schepperdys that letyn here scheep wetyngely go renne to the wolf that is in the brerys / ne do no fors of here owene gouernaunce [722] of this comyth pouerte / & distruccyoun bothe of spirituel & temperel thyngis / thanne comyth a maner coldnesse / that fresith al the herte of man / [723] Thanne comyth ondeuocioun / thour whiche a man is so blent. And as seyth seynt Bernard / hat swich langour / in soule that he may neythyr / reede ne synge in holy cherche / ne heere ne thynke of no deuocioun / ne trauayle with hise handys in no good werk that it nys to hym vnsauourry And al appallid / [724] thanne wexith he slow & slombry and soone wele be wroth / And sone is enclynyd to haate & to enuye / [725] ¶ Thanne comyth the synne of wordely sorwe / swich as is clepid tristicia / that [folio 427b] sleth man as seyth seynt Poul / [726] ffor certis swich sorwe werkyth to the deth of the soule & of the body also ffor therof comyth that a man is a-noyed / of his owene lyf. [727] wherfore swich sorwe. schortyth ful ofte the lyf of man / er that his tyme is come by weye of kynde./
