[6-text p 634] bothe of cryst & of hise seyntis / & ek of alle hise halwys. [560] Is nat this a cursed vse. ȝis certis allas it be-nemyth from man his wit & his resoun / & al his debonayre lyf spirituel that schulde kepe his soule // [561] Certis it be-nemyth ek goddis due lordschepe. & that is mannys soule / & the loue of hise neigheboris // It stryuyth ek alday ageyn trouthe / it reuyt hym the quyete of his herte & subuertith his soule.
[562] Of Ire comith these stynkende gendruris Fyrst hate that is old wrathe / Discord thurh whyche a man for-sakith his olde frend / that he hath louyd ful longe / [563] And thanne comyth werre & euery maneere of wrong that man doth to his neghebour in body or in catel. // [564] Of this cursede synne of Ire comyth ek manslaughtre / And vndirstonde weel that homycide that is manslaughtre is in dyuerse thyngis. sum manere of homycide is spirituel. & sum is [folio 420a] bodyly. [565] Spirituel manslaughtre; is in .vj. thyngis. Fyrst bi hate as seyth seynt Iohn that he that hatith his brothyr is homycide [566] homycide is ek bi bakbitynge of whiche bakbiteris seyth Salomon that they han two swerdis / whith whiche they sleen heere neigheborys / for|sothe as wikke is it to be-neme hym his goode name / as his lyf. [567] Homycide is ek in ȝeuynge of wikkede conseyl be fraude / As for to ȝeue conseyl to areyse wrongful customys / & talagis [568] of whiche seith Salo|mon / Leoun rorynge & Bere hungery; been lik to the crewel lordschepis in whiche lordschepis holdynge or a bregynge of the schepe or the heere of the wagis of seruauntis / or ellis in vsure or in withdrawynge of the almesse of poore folk / [569] ffor whiche the wyse man seyth ffedith hym that almost deyeth for hungir. ffor sotly but ȝif thow feede hym thow slest hym. And alle these been dedly synnys / [570] Bodily manslauȝtere is this / whan thow slest hym with thyn tunge. In othere manere; as whan thow comaundist to sleen a man / or ellis ȝeuyst hym conseyl to sleen a
