[6-text p 633] ryȝt so as fyr is moore myȝty to distroye ertheli thyngis / than ony othir elemen / ryȝt so Ire is myty to distroye alle spirituel thyngis / [548] loke ho that fuyr of smale gledys that been almost dede vndir aschyn welyn quekyn a-geyn whan they been touchede / with brynston / right so Ire wele eueremore quekyn a-geyn / Whan it is touchid by the pryde that is couered in manys herte [549] for certis fyr ne may not come out of no thyng but if it were fyrst in the seme thyng naturelly as fyr is drawyn out of flyntys with styl. [550] And ryght so as pryde is manye tyme matire of yre; righ so is rancure noryce & kepere of Ire // [551] There is a manere [folio 419b] of tree as seith seynt Isydre that whan men make fyr of the ilke tre & kouere the colis with aschyn / sothly the feer of it wil lastyn ale a ȝeere or more / [552] And riȝt so farith it of rancure / what it is coueryd in the hertis of summe men certeyn it wele laste perauenture / from oon Esterne day On tyl a nothir esterne day / & moore / [553] but certis thilke man is ful fer from the mercy of god al thilke while.
[554] In this forseyde deuyllis furneys / there forgyn iij schrewis / Pryde that ay blowyth & encresith the feer by chydyng & welkede wordis / [555] thanne stondith Enuye And holdyth the hoote yryn in the fyr vp-on the herte of man / with a peyre of longe tongis; of long rancur [556] And thanne stant the synne of contumelye or stryf & cheest & baterith & forgith by vileyns repreuyngis [557] Certis this cursede synne a-noyeth bothe to the man hym self & ek to his neighebore / for sothly almost al the harm that ony man doth to his neighebore comyth of wrathe / [558] ffor certis outragious wratha doth al that euere the deuyl comaundyth hym / For he ne sparith nothyr crist ne his swete modyr / [559] & in his out|ragious angir / & Ire Allas ful manyon / that tyme felyth in his herte / ful wikkedely
