[6-text p 626] A nothir is a man to haue a noble herte / & a diligent to atteyne to here vertuuous thyngis [470] ¶ Now certis a man to pride hym in the goodis of grace / is ek an outragious folye for thilke ȝiftis of grace / that schulde a turnyd hym to goodnesse / And to medicyne turnyth hym to venym and to confusioun as seith seynt gregory // [471] Certis also ho so prydith hym in the goodis of ffortune; he is a ful greet fol / for sumtime is a man a ryȝt greet lord be the morwyn / that is a caytif & a wreche er it be euyn [472] And sumtyme the richesse of a man; is cause of his deth Sumtyme the delicis of a man; is cause of the greuous seknesse thour whiche he deyeth / [473] Certis the comendacioun of the peple / is sum|tyme ful fals & ful brethil for to triste / this day they preise / to morwe they blame. [474] god wot desir to haue commendacioun of the peple hath caused deth to manye a besi man [475] ¶ Now sithe that so is / that ȝe han vndirstonde what is pride / & whiche been the spicis of it / And whens pride sordith & spryngith /
Remedium contra peccatum Superbie (in the margin).
[476] Now schul ȝe vndirstonde whyche is the remedye a|ȝens pride ¶ Humylite or . . . . [no gap in the MS.] meknesse / [477] is the remedye Ageyns Pride / that is vertu thorw whiche a man hat verray knowelechyng of hym self. & heldith of hym self no prys ne deynte / as in regard of hise de|sertys / considerynge euere his frelte [478] ¶ Now be there thre maneris of humilitee. as humylite in herte / And othir humylite in his mouth. the thredde in hise werkis / [479] The humilite in herte; is in foure maneris / that on is whan a man holdyth hym [folio 416a] self as nygh wroth bi-fore god of heuene / A nothir is whan he dispiseth
