De Superbia et eius dependencijs circumstancijs spectantibus
[Harl. MS. 1758 folio 212b][387] NOw is it bi-houeli thyng to tellen whiche ben dedly synnes. that is to seie. kaitifnesse of synnes alle they renne in colis. But in dyuers maner. Now ben thei clepid kaitifes. ffor as meche as thei ben chief & spryngen of alle other synnes. [388] ¶ Of the rote of these .4. synns. Then is pride the generall rote of alle harmes ¶ ffor of this rote spryngen certeyn branchis. as. Ire. Enuye. Accidie. or slewthe. Auarice or couetise to comyn vndirstondyng. Glotenye & lecherie. [389] And eueryche of these cheef synnes hath his branchis & his twigges as schall be declarid in her chapitres folwyng.
[Of Pride, and its Twigs.]
[390] ¶ And thogh so be that no man can telle vtterli the nombre of the twigges & of the branchis that cometh of pride. yet woll I schewe a partie of hem as ye schullen vndirstondyn. [391] ¶ Ther is. inobedience. Auauntyng. Iprocrisie. Dispite. Arregaunce. Impudence. Swellyng of herte. Insolence. Elacion. Inpacience. Strif. Contumacie. Presumpcion. Irreuerence. Pertynacie. Veynglorie. And manye another twigge that I can noȝt declare. [392] Ino|bedience is he that disobeieth for dispite to the comaunde|ment of god & to his souereynes & to his gostly ffadir. [393] ¶ Auauntour is he; that bosteth of the harme or of the bounte that he hath done. [394] Ipocrisie is he that hideth hym to schewe hym suche as he is & schewith hym suche as he is not. [395] ¶ Dispitous is he that hath disdeyn of his neighboris. that is to seyn of his euyn cristen or hath dispite to do that he ought to do. [396] ¶ Arrogaunt is he. that thenketh that he hath thilke bountees in hym that he hath not. Or
