[6-text p 618] Ek ȝif he loue wyf or child or othir wordely thyng more than resoun requyrith / Ek ȝif he flatere or blaundise more than hym oughte for ony necescite. [377] Ek ȝif he withdrawe or menuse the almesse of the poore. Ek ȝif he apparayle his mete more delisciously than nedyth or ete to hastily by licourse|nesse /. [378] Ek ȝif he tale uenyteis at cherche / or at godis seruyse / or that he be a talkere of idele wordis / of folye / or of vilenye / for he schal ȝilde acountis of it at the day of doome / [379] Ek whan he hotith or assuryth a thing that he may not parforne / Ek whan he by lightnesse or foly / mysseith or skornyth his neghebour. [380] Ek whan he hat ony wekke suspecioun of thyng that he wot of no soth|fastnesse [381] ¶ These thyngis And mo with-outyn noumbre ben synnys / as seith seynt Augustyn
[382] ¶ Now schal men vndirstonde that al be it so that non erthely man / may eschewyn alle venyal synnys; ȝit may he refreyne hym by the brennynge loue that he hath to oure lord / Ihesu crist/ And by preyeris & confessioun & othere goode werkys / so that it schal but litil greue / [383] For as seith seynt Augustyn / ȝif a man loue god in swich manere / that al that euere he doth is in the loue of god . . . [no gap in the MS.] werrayly / for he brennyth in the loue of god / [384] loke how meche that a drope of watyr / that fallyth in a furneys ful of feer avaylyth / or greuyth / so meche anoyeth a venyal synne to a man / that is parfit in the loue of Ihesu Crist . . . . . [no gap in the MS.] be resseyuynge ek of holy watyr / by almesse dede by general confessioun of Confiteor at the masse / and at Compelyn / And be blyssynge of Besschopis & of Prestis & by othere goode werkys. [[leaf 412 is cut out of the Cambr. MS.]]
