[6-text p 609] word of ysaye ¶ He was woundit for oure mysdedis / & defoulid by oure felonyes [282] ¶ Now sithe that Ihesu crist tok vp on hym self / the peyne of al oure wekkedenesse; Meche ouȝte synful man wepyn / & be-waylyn that for hise synnys; goddis sone of heuene schulde al this peyne endure [283] THe .vj. [.vj.a] thyng that schulde meue a man to contricioun; is the hope of .iij. thyngis that is to seyne forȝeuenesse of synne / And the ȝifte of grace weel for to do And the glorie of heuene / with whiche god schal gerdounnyn man / For hise goode dedis / [284] And for as meche as Ihesu crist ȝeuyth vs these ȝiftis of hise largenesse & of his souereyn bountee. therfore is he clepid Iesus [[MS. Ihc]] nazarenus rex iudiorum [285] Ihesu is to seyne sauyour / or sal|uacioun on whom men schul han forȝeuenesse as they schul hope of here synnys / whichiche that is properly saluacioun of synnys [286] And therfore seyde the aungel to Ioseph // Thow schalt clepe his name Ihesus that schal saue his peple / of here synnys / [287] and here of seyth seynt petir Theere is non othir name vndir heuene that is ȝeue to ony man / by whiche a man may be sauyd / but only Ihesus. [288] Nazarenus / is as meche for to seyne as flouryschynge in whiche a man schal hope that he that ȝeuyth hym remyssioun of synnys schal ȝeue hym ek grace / weel to do ¶ ffor in the [folio 407b] flour is hope of freut tyme comynge / And in the forȝeuenesse of synne / hope of grace weel to do [289] I was at the dore of thyn herte seyth Ihesus / & clepede for to entere / he that openyth to me schal haue forȝeuenesse / of synne / [290] I wele entere in to hym be myn grace / And soupe with hym by the goode werkis that he schal doon / whiche werkis been the fode / of which / & he schal soupe with me by the greete Ioye / that I schal ȝeue hym / [291] ¶ Thus man schal hope / for hise werkis of penaunce / that god schal ȝeue hym his regne / as he behetyth hym in his gospel
[292] NOw schal a man vndyrstonde in which
