[6-text p 599] seruauntys & thralles to synne & soore been aschamyd / of hem self / [153] that [folio 402b] god of his endeles goodnesse / hat set hem in high estat or ȝeuyn hem wit strenthe / hele of body / beute prosperite / [154] & boughte hem from the deth with his herte blood that they so onkendely aȝens his gentilesse / quytyn hym so vileynly to slauthere of here owene soules. [155] O goode god / the wemen that been of greet beute. remembrith ȝow of the prouerbe of salomon / he seyth [156] & likkenyth a fayr woman þat is a fol of hire body; lik to a ryng of gold / þat were in the groyn of a sowe / [157] ffor rygh as a Sowe wrothith in eueryche ordure; so wrotith sche hire beute / in stynkynge ordure of synne [158]
THe thredde cause þat oughte to meue a man to contrycioun; is drede of the day of dome & of the horrible peynys of helle / [159] ffor as seynt Ierom seith At euery tyme that me remembrith of the day of dome; I quake. [160] for whan I ete or drynke or what so euere I do / euere semyth me that the trumpe sounyth in myn ere. [161] Ryseth ȝe vp that been dede & comyth to the Iugement. [162] O goode god meche ouȝte a man to drede / swich a Iugement/ there as we schul been alle as seynt poule seyth by fore the cete of oure lord Ihesu Cryst / [163] where as he schal makyn a general con|gregacioun / where as no man may Been absent / [164] for certis there auaylith non essoyne ne excusacioun / [165] And not only that oure fautis schuln ben Iugit. but that alle oure werkis schuln opynly been knowe / [166] And as seyth seynt Bernard / There ne schal no pledynge auayle ne no slyȝte / we schul ȝeue rekenynge / of euery Idele wod [167] there schul we han a Iuge / þat may not ben disseyued ne corupt / And why / ffor certis al oure thouȝtis been discryued as to hym / ne for preyer ne for mede he schan not ben corupt / [168] And therefore seyth salomon / the wrethe of god . . . . . [no gap in the MS.]
