[6-text p 277]
[6-text p 278]
¶ O myghty Cesar that in Thessalye [Cesar]
A-geyns Pompeynys fadyr thyn in lawe
That of thorient hadde al the Chiualrye [folio 361a]
As fer as that the day be-gynnyth dawe
Line 3872
Thow thour thyn kynghod hast hem take & slawe
Saue fewe folk that with Pompeious fledde
Thorw which thow puttist al the oryent in awe
Thanke fortune that so weel the spedde
Line 3876
But now a lytyl while I wele bewayle /
This Pompeyous this nobele gouernour
Of Rome whiche that fleigh at this batayle
I seye on of his men a fals traytour
Line 3880
His hed of smot to wynnyn hym fauour
Of Iulius & hym the hed he broughte
Allas Pompeye of thorient Conquerour
That ffortune vn-to swich a fyn the broughte
Line 3884
To Rome a-gayn repayrith Iulius
With his tryumphe lauryat ful hye
But on a tyme Brutus Cassius
That euere hadde of his estaat enuye
Line 3888
Ful pryuyly hath mad conspiracye
A-geyns this Iulius in subtyl wise
And caste the place in whiche he schulde deye
With boydekynys / as I schal ȝow deuyse
Line 3892
This Iulius to the capitolye wente
Vp-on a day as he was wone to goon
And in the Capitolye a-non hym hente
This false Brutus & 1hese othere ffoon1 [[1_1 corrected]]
Line 3896
And stikede hym with Boydekynys a-noon
With manye a wounde & thus they leete hym lye
But neuere gront he at no strok but oon
Or ellis at two / but if his storye lye
Line 3900
