[6-text p 265]
But at the laste hire frendys haddyn hire maryed
To onedake a prynce of that cuntree
Al weere it so that sche hem longe taryed
And ȝe schal vndyrstonde how that he [[he corrected]]
Line 3464
Hadde swiche fantasyis as hadde sche
But nathelees whan they weere knyt in feere
They leuede in Ioye & in felycite
For eche of hem hadde othir leef & deere
Line 3468
Saue on thyng that sche wolde neuere assente
By no wey. that he schulde by hire lye
But ones: for it was hire pleyn entente
To haue a child the world to multyplye
Line 3472
And also sone as sche myghe espye
That sche was nat with childe with that deede
Thanne wolde sche suffere hym don his fantasye
Eft sonys & not but onys out of dreede
Line 3476
And If sche were with childe [[childe, more, corrected]] at tylke cast [folio 356b]
Namore [[childe, more, corrected]] schulde he pleyen tylke game
Tyl fynally fourty dayis weere past
Thanne wolde sche onys suffere hym the same
Line 3480
Al weere this Onedake wilde or tame
He gat na moore of hire for thus sche sayde
It was to wyuys lecherye & schame
In othir cas ȝif men with hem playede
Line 3484
Two sonys bi this Onedake hadde sche
The whiche sche kepte / in vertu & lettyrure
But now vn-to oure tale turne we
I seye so worschepeful a criature
Line 3488
And wis therewith & large with mesure
So peynyble in the werre & curteys ek
Ne moore labour myghte in werre endure
Was noon thow al this world men schulde seeke
Line 3492
