[Nebuchadnezzar.]
¶ The myȝty trone the precious tresor [¶ Nabegodonosor]
The gloriouse Ceptre & royal mageste
That hadde the kyng Nabegodonosor
With tunge onethe may discryuede be
Line 3336
He twijs wan Ierusalem Cete
The vessel of the temple he with hym ladde
At babiloine was his souereyn see
In whiche his glorye & his delyt he ladde
Line 3340
The fayreste childeryn of the blod royal [folio 354b]
Of Israel he leet do gilde a-noon
And makede eche of hem to been his thral
A-mongis othere Danyel was oon
Line 3344
That was the wiseste child of euerichon
For he the dremys of the child expoungnede
Where-as in chaldeye clerk was theere noon
That wiste to what fyn hise dremys sounede
Line 3348
The proude kyng leet make a statute of gold
Syxti Cubitis longe & seuene in breede
To whiche ymage he bothe ȝonge & olde
Comaunded to loute & haue in dreede
Line 3352
Or in a furneys ful of flaumbis reede
He schal been brend that wolde not obeye
But neuere wolde assente to that deede
Danyel ne hise ȝonge felawys tweye
Line 3356
This kyng of kyngis proud was & elayt
He wende that god that sit in Mageste
Ne myghte hym not byreue of his estat
And sodeynly he loste his dygnetee
Line 3360
And lik a beste hym semede for to bee
And eet hey as an oxe & lay there oute
In reyn with wilde bestis walkede he
Tyl certeyn tyme was I-comyn a-boute
Line 3364
