[6-text p 195]
Syre Thopas drow a-bok ful faste
This Ieaunt at hym stonys caste
Out of a fel staf slynge
Line 2019
But fayre eschapith sire thopas
And al was thour godys gras
And thour his fayre berynge
Line 2022
Yit lestyth lordyngis to myn tale
Muryere than the nyghtyngale
I wele ȝow roune
Line 2025
How sire Thopas with sydis smale
Prykynge ouyr hil & dale
Is comyn a-geyn to toūne
Line 2028
Hise merye men comaundede hee
To make hym bothe gamyn & glee
for nedys muste he fyghte
Line 2031
With a geaunt with hedis thre
ffor paramour & Iolyte
Of oon that schon ful bryȝt
Line 2034
Do come he seyde myne mynstralis
And Gestourys for to tellyn talys
A-non in myn armyng
Line 2037
Of romauncis that been royalis [folio 324b]
Of popis & of Cardenalys
And ek of loue lykynge
Line 2040
They fette hym fyrst swete wyn
And mede ek in a Mahelyn
And royal spicerye
Line 2043
Of gynge breed that was ful fyn
And lychorys & ek comyn
With sugere that is trye
Line 2046
