[6-text p 192]
He coude hunte at wilde deer
And ryde on hauking for ryueer
With grey goshauk & hunde
Line 1928
Therto he was a good archier
Of wrastelyng was theere non his pir
Theere ony ram schal stonde
Line 1931
fful manye a maydyn brygh in bour
They mornede for hym paramour
whan hem were bet to slepe
Line 1934
But he was chast and no lechour
And sweete as is the brymbil flour
that beryth the rede hepe
Line 1937
And so it fil vp-on a day
ffor-sothe as I ȝow telle may
Sire Thopas wolde out ryde
Line 1940
He worthith vp-on hise stede bay
And in his hand a launcegay
A long swerd by his syde
Line 1943
He prykyth thorw a fayr forest
Therein is manye a wylde best
ye bothe bukkys & hare
Line 1946
And as he prykyth north & est
I telle it ȝow hym hadde al-mest
Bytid a sory care
Line 1949
Theere spryngyn erbis grete & smale
The lycorys & the Cetewale
And manye a clowe Ielofere
Line 1952
And notemuge to putte in ale
Whethir it be moyst or stale
Or for to leye in cofere
Line 1955
