Byhold the myrie talkynge of the Hoost to Chaucer [folio 322b]
WHan seyd was al this myrakele euery man [folio 323a]
As sobere was that wondir was to see
Til that oure hoost Iapyn tho [[later]] be-gan
And thanne at erst he lokede vp-on mee [.i. Chaucer]
And seide thus what man art thow quod he
Thow lokyst as thu woldyst fynde an hare
ffor euere vp-on the ground I se the staare
Line 1887
Approchith neer & loke vp myryely
Now ware ȝow seris & lat this man haue place
He in the wast is schape as weel as I
This weere a popet in an arm tenbrace
Line 1891
ffor ony weman smal & fayr of face
He semyth eluych by his cuntenaunce
ffor vn-to no wygh doth he no dalyaunce
Line 1894
Sey now sumwhat syn othere folk han seyd
Telle vs a tale of myrthe & that a-non
Hoost quod I ne beth nat yuele apayed
ffor othir tale certis can I non
Line 1898
But of a rȳm I lernede longe a-goon
Ȝe that is good quod he now schul we here
Sum deynte thyng me thynkyth by hise cheere
Line 1901
