and begynneth þe tale
[Sloane MS 1685 folio 183]
[Lor]dynges quod/ he in Chirche whan I preche
[I] peyne me to haue an hautyn speche
[And] rynge it/ oute as rounde as goth a belle
ffor I con alle by roote þat I telle
Line 332
[My teme] ys alle-way on and euere was
Radix omnium malorum est cupiditas
ffyrst/ I pronounce whens þat I come
And þan my bulles shewen alle and somme
Line 336
Oure lege lordes seal on my patent
þat/ shewe I fyrst/ my body to warant/
That no man be so bolde prest nor Clerk
Me to disturbe of/ crystes holy werke
Line 340
And after þat telle I forthe my tales
Bulles of Popes and of/ Cardynales
Of Patryarkes and Bysshopes I shewe
And in laten I speke wordes fewe
Line 344
To sauere with my predicacioun
And forto styrre men to deuocioun
þan shewe I forth my longe Cristal stones
I-crommed fulle of/ cloutys and of bones
Line 348
Relikes þei bene as wene þei ychone
þan haue I in laton a shulder bone
Whiche þat was an holy Iewes shepe
Goode men say I take at my wordes kepe
Line 352
ȝif þat þis bone be wasshen in a welle
ȝif/ cowe or Calf/ shepe or Ox swelle
þat any worme hathe ete or stonge
A-boute þe herte or elles þe longe
Line 356
