[6-text p 437]
Grisilde quod he bi god that for vs deyede
Thow art myn wif / ne non oþer ne haue
Ne neuere ne hadde as god myn soule saue
Line 1064
This is thyn douȝtyr / which þow hast supposyd
Line 1065
To been myn wyf / þat oþer feithfully
Schal been myn eyr / as I haue ay supposid
Thow bar hym in thyn body trewely
Line 1068
At Boloyne haue I kept hem pryuyly
Take hem a-geyn for now þow mayst nat seye
That þou hast lost non of thynne childeryn tweye
Line 1071
And folk that oþere weyis han seyd of mee
Line 1072
I warne hem weel that I haue don this dede
ffor no maleys / nor for no creueltee
But for tassaye in the thyn womanhede
Line 1075
And not for to sle mynne childeryn god for-beede
But for to kepe hem priuyly & stille
Til I thyn purpos knew & al thyn wille
Line 1078
Whan this sche herde / aswounne doun sche fallyth
Line 1079
ffor pytous Ioye & aftyr hire swounynge
Sche beþe hire ȝonge chyldere vn-to hyre callyth
And in hire armys / pitously / wepynge
Line 1082
Enbrasyth hym / & tenderely kyssynge
fful lyk a modyr with hire salte terys
Sche bathith bothe hire visage & hire herys
Line 1085
O which a pitous thyng it was to se
Line 1086
Hire swounnynge & hire humble voys for to heere
Graunt mercy lord / god thanke ȝow quod sche
That ȝe han sauede me mynne chyldere deere
Line 1089
Now rekke I neuere to been ded ryȝt here
Sithe I stonde in ȝoure loue & in ȝoure grace
No fors of deth ne whan myn spiryt pace
Line 1092
