[6-text p 418]
ffor which þis Markys / wrowt in þis manere [folio 249a]
Line 463
He cam alone / a nyȝt þere as sche lay
With sterne face / & with ful sturdy chere
And seyd thus / Grisilde quod he þat day
Line 466
That I ȝow tok / out of ȝoure pore aray
And put ȝow in estat/ of hegh noblesse
ȝe han not þat / forgetyn as I gesse
Line 469
I sey Grisilde / this present dignete
Line 470
In which þat I haue / put ȝow / as I trowe
Makyth ȝow nat / forȝetful for to be
þat I ȝow tok / in pore estaat ful lowe
Line 473
ffor ony wele / ȝe motyn ȝoure seluyn knowe
Take heed of / euery word þat I ȝow seye
Ther is no wight / þat hereth it but we tweye
Line 476
Ye woot youre self wel / how that ye cam heere
Line 477
In-to this hous / it is nat longe a-go
And thow to me / þat ye been lef & deere
Vn-to myn sentens ye been nothyng so
Line 480
They seyn to hem / it is greet schame & wo
ffor to been subiect / & been in seruage
To the þat born art / of a smal village
Line 483
And nameliche / sithe thyn doughtyr was bore
Line 484
These wordis han / they spoke douteles
But I desire / as I haue doon by-fore
To lyue myn lyf / with hem in reste & pees
Line 487
I may nat in / this cas been rechelees
I mot doon with thyn / doghtyr for the beste
Nat as I wolde / but as myn peple leste
Line 490
And ȝit god wot / it is ful looght to me
Line 491
But natheles / with-outyn ȝoure wytynge
I wol not don / but this wol I quod he
That ȝe to me / assente as in this thyng
Line 494
