[6-text p 414]
No wondir ist / þow þat sche were a-stonyd
Line 337
To seen so greet / a geste come in-to plase
Sche neuere was / to swich a geste wonyd
ffor whiche sche lokede / with ful pale face
Line 340
But schortly þis / matyer for to chase
These are þe wordis / þat þe Markis sayde
To þis benynge / veray fey[t]hful mayde
Line 343
Grysilde he seyde / ȝe schul wel vndyrstonde
Line 344
It lykyt to ȝoure / fadyr & to me
That I ȝow wedde / & ek it may so stonde
As I suppose / ȝe wele þat it so be
Line 347
But þese demaundis / aske I ferst quod he
That sythe it schal / been don in hasty wyse
Wele ȝe assentyn / or ellis ȝow auyse
Line 350
I seye þis be ȝe / redy with good herte
Line 351
To al myn lust / & þat I frely may
As me best lykyth / do ȝow lauhe or smerte
And neuere ȝe / to groche it nyght ne day
Line 354
And ek whan I seye ȝa / ne seye not nay
Neyther be word / ne frounnynge cuntenaunce
Swere þis / & here I swere oure allyaunce
Line 357
Wonderynge vp-on þis word quakynge for drede [folio 247b]
Sche seyde lord / vndyng & vn-worthy
I am to thilke honour þat ȝe me beede
But as ȝe wele ȝoure self ryȝt so wele I
Line 361
And here I swere / þat neuere wyllyngly
In werk ne thouȝt I nyl ȝow disobeye
ffo[r] to be ded thow me were loth to dye
Line 364
T[h]is is I-nogh Grysilde myn quod he
Line 365
And forth he goth with a ful noble cheere
Out at þe dore & aftyr þat cam [[cam: later, over an erasure.]] sche
And to þe puple he seyde in þis manere
Line 368
