[6-text p 370]
And but I be to morwe as fayr to sene
As eny lady Emperesse or quene
That euere was be-twixse þe Est & þe west
Doth with myn lyf & doth ryȝt as ȝow lest
Line 1248
Cast vp þe curtyn & loke how þat it is
And whan þat þe knyght saw verrayly al þis
That sche so fayr was & so ȝyng þerto
ffor ioye he hente hyre in hise armys too
Line 1252
His herte bathit in a bath of blys
A thousent sythe a rowe he gan hire kys
And sche obeyede hym in euery thyng
That myȝte do hym plesaunce or lykyng
Line 1256
And þus þey lyue vn-to here lyuys ende
In parfyt Ioye & Ihesu crist vs synde
Husbondis meke ȝinge & frosche in bedde
And grace to ouer byde hem þat we wedde
Line 1260
And ek I preye Ihesu schorte here lyuys
That wele not been gouernyd by here wyuys
And olde & angery nygardys of dispence
God sende hem sone verray pestelence
Line 1264
Here endith the Wif of Bathe hyre tale [[Gap of one line in the MS.]]
