[6-text p 357]
And whanne I hadde I-getyn on to me
By maysterye al þe souereyntee
Thanne he seyde myn owene trewe wyf
Do as ȝe leste for terme of al ȝoure lyf
Line 820
Keep thyn honour & thyn estat
Aftyr þat day we ne haddyn neuere debat
God help me so I was to hym as kynde
As ony wif from denmark vn-to Inde
Line 824
And as trewe & so was he to me
I preye to god þat sit in mageste
So blysse his soule for his mercy dere
Now wele I seye myn tale ȝif ȝe wele here
Line 828
[The Wrangle between the Summoner and Friar.]
The frere low whan he hadde herd al this
Now dame quod he also haue I Ioye or blis
This is a long preamble of a tale
And whan þe somnour herde þe frere gale
Line 832
Lo quod the sumnour bi goddys armys too
A frere wele entirmete hym euere mo
Lo goode men a flye & ek a frere
Wele falle in euery disch & matere
Line 836
What spekyst þou of perambulacioun
What amble or trotte or pes or go sit doun
þou lettyst oure desport in þis matiere
ȝa wilt þou so syre somnour quod þe frere
Line 840
Now by myn fey I schal er þat I go [folio 222a]
Telle of a sumnour a tale or too
That alle þe folk schul law he in þis place
Now ellis frere I be-schrewe thyn face
Line 844
Quod this sumnour & I be-schrewe me
But ȝif I telle talis too or thre
Of freris er I come to Sidyngborne
That I schal make þyn herte for to moorne
Line 848
