Thow hauene of refut bryȝte sterre of day
Rewe on myn child þat of þyn gentillesse
Rewist on euery reuful in destresse
Line 854
O lityl child allas what is þyn gilt
That neuere wroughtist synne as ȝit parde
Whi wolde thyn harde fadyr han þe spilt
O mercy dere constabele quod sche
Line 858
As lat myn lytil child dwelle here with þe
And ȝif þou darst not sauyn hym from blame
So kysse hym onys in hese faderys name
Line 861
Therwith sche lokith bakward to þe londe
And seyde farewe[l] housbonde routheles
And vp sche rist & walkyth doun þe stronde
Toward þe schip here folwyth al þe pres
Line 865
And euere sche preyeth hire child to holde hise pes
And takyth hire leue & with an holy entente
Sche blysseth hire & in-to schip sche wente
Line 868
Vitaylid was þe schip it is no drede [folio 206b]
Habundaunt for hyre ful longe space
And oþere necessaryis þat schuldyn nede
Sche hadde I-now haryed be godis grace
Line 872
ffor wynd & wedyr al-myȝty god purchase
And brynge hire hom I can no betere seye
But in þe se sche dryuyth forth hire weye
Line 875
[PART III.]
Alla þe kyng comyth hom soone aftyr þis
On-to þe Castel whiche I tolde
And axsith where þat his wif & his child is
The Constabele gan a-boute hise herte colde
Line 879
