He drank & wel hise gerdyl vndyr pyȝt
He slepith & he snortith in hise gyse
Al nyȝt tyl þe sunne gan a-ryse
Line 791
Eft were hise letterys stolyn euerychon
And counterfetid letterys in þis wyse
The kyng comaundyth hise constablis a-non
Vp peyne of hangynge & heigh Iuyse
Line 795
That he ne schulde suffere in no wyse
Custaunce in whith [[altered from whiche]] his regne for tabyde
Thre dayis & a quartyr of a tide
Line 798
But in þe same schip as he hire fond [folio 205b]
Hire & hyr ȝenge sone & al hire geere
He schulde putte & croude from þe lond
And charge hire þat sche neuere eft come þere
Line 802
O myn custaunce wel may þy gost haue fere
And slepynge in þyn drem han penaunce
Whan donegilt caste al þis ordenaunce
Line 805
This messenger on morwe he wok
On-to þe castel holt þe neste wey
And to þe constabele he þe lettere tok
And whan þat he þis pitous lettere say
Line 809
fful ofte he seyde allas & weyle-away
Lord crist how may þis world endure
So ful of synne is manye a cryature
Line 812
O myȝti god ȝif þat it be þyn wille
Sith þou art ryȝtful Iuge how may þis be
That þou wit suffere innocentis to spille
And wekede folk regnyn in prosperite
Line 816
O goode Custaunce allas so wo is me
þat I mote be þyn turmentour or deye
On schamys deth þere is non oþer weye
Line 819
