In orisounys with manye a bittere tere
Til Ihesu hath conuertede þour hese grace
Dame Ermengilt Constabellesse of þat place
Line 539
In al þat lond no cristene durste at route
Alle cristen folk ben fled from þat cuntre
Thour poynyms þat conqueredyn al a-boute
The plagis of the north & se
Line 543
To walis fledde þe cristianyte
Of olde brytunys dwellynge in þis yle
There was hire refeut for the mene while
Line 546
But ȝit nere cristene britounys so exiled
þat þere nere some þat in hire priuite
Honourede crist & hethene folk begilede
And n[i]gh þe castel [[altered]] swich [[altered]] þere dweltyn thre
Line 550
That on of hem was blynd & myȝte not se
But it were with þe ilke eyen of hise mynde
Wit[h] whiche men sen aftyr þat þey ben blynde
Line 553
Bryȝt was þe sune as in þat someris day [folio 202a]
ffor which þe Constabel & hese wyf also
And custaunce hath I-take þe ryȝte way
Toward þe se a furlong wey or to
Line 557
To pleyen & to romyn too & fro
And in hire walk þis blynde man þey mette
Crokid & old with eyen faste I-schette
Line 560
In name of cryst cryede þis blynde Erytoun
Dame Hermengelt ȝif me myn syȝt a-geyn
This lady wex a-freyed of þe soun
Lest þat hire husbonde schortly for [to] seyn
Line 564
Wolde hire for ihesu crist han slayn
Til Custaunce made hire bold & bad hire for to werche [[altered]]
The wil of crist as doughtyr of hise cherche
Line 567
