There euery with saue he maystyr & knave
Was with the lyoun frete er he a-sterte
Non wigh but god þat he bar in hese herte
Line 476
God lyste to schewe his wondyrful merakele
In hire for we schud sen hise myȝty werkys
Cryst which þat is / to euery harm tryakele
Be serteyn mene oftyn as knowyn klerkes
Line 480
Doth thyng to serteyn ende þat ful derk is
To mannys wit that for oure ignoraunce
Ne kunne not knowe hese prudent puruyaunce
Line 483
Now sythe sche was not at the feste slawee [folio 201a]
Who kepte hyre from the drenchynge in þe see
Who kepte Ionas in the fyschis mawee
Thil he was spoutid out at niniuee
Line 487
Wel may men knowe it was no wiȝt but he
That kepte þe peple Ebrayk from here drenchynge
With dreye feet thorw-out þe se passynge
Line 490
Who bad the foure spirytis of tempest
That power han tanoyen lond & se
Bothe north & south & also west & est
Anoyeth neyþer se lond ne tree
Line 494
Sothly the comaundour was hee
That from the tempest ay [[altered]] this [[altered]] woman kepte
As wel whan sche wok as whan sche slepte
Line 497
Where myȝte this woman mete or drynk haue
Thre ȝer & more how lastyth hire vitayle
Ho fedde þe egipcien marye in þe caue
Or in desert no wiȝt but crist sauns fayle
Line 501
ffyue thousent folk it was a gret meruayle
With louys fyue & fyschis too to feede
God sente hese foysoun at here moste neede
Line 504
