A serteyn trosor that sche theþer ladde
And soth to sayn vitayle gret plente
They han hyre ȝeuyn & clothis ech sche hadde
And forth sche saylyth in the salte see
Line 445
O myn custaunce ful of benyngnete
O emperouris douȝtyr ȝonge dere
He that is lord of fortune be thi stere
Line 448
Sche blysseth hire & with ful pitous voys [folio 200b]
On to the Croys of crist thus seyde sche
O cler o wilful auter holy cros
Reed of the lambis blod ful of pite
Line 452
That wesch þe world from old iniquite
Me from the fend & from hese clawis kepe
That day þat I schal drenchyn in þe deepe
Line 455
Victorious tre protexioun of trewe
That only worthy were for to bere
The kyng of heuene withese woundis newe
The white lomb that hurt was wyt a spere
Line 459
fflemere of feendis out of hym & hire
On which thyn lyfis feythfully extenden
Me kep & ȝif me myȝt myn lyf to a-menden
Line 462
Ȝeerys & dayis fleth this creature
Torw-out the strem of grece in-to strayte
Of marrok whiche that was hese auenture
On manye a sory Mel now may ȝe beyte
Line 466
Aftyr hire deth ful ofte may sche wayte
Er than þe wylde wawys wole here dryue
Vn-to the place there sche schal a-ryue
Line 469
Men myȝtyn axsyn whi sche was not slayn
Ek at the feste ho myȝte hire body saue
And I answere to that demaunde a-gayn
Ho sauede daniel in þe orybele caue
Line 473
