The freut of this matiere is þat I telle
Whan tyme cam men thouȝte it for þe beste
That reuel stynte & men gone to here reste
Line 413
The tyme cam this olde soudonesse [folio 200a]
Ordeynyd hath this feste of which I telle
And to þe feste cristene folk hym dresse
In general ȝe bothe ȝynge & olde
Line 417
Here may men feste & rialte be-holde
And deynteis mo þan I can ȝow deuyse
But al to dere they bouȝte it er they ryse
Line 420
O sodeyn wo that euere art successour
To wordely blysse spreynt with bittyrnesse
Thende of the ioye of oure wordely labour
Who occupiet the fyn of oure gladnesse
Line 424
Herkene þis conseyl for thyn sekyrnesse
Vp-on thyn glade day haue in thyn mynde
The onwar wo or harm that comyth be-hynde
Line 427
ffor schortely for to tellyn at on word
The soudon & the crystene euerychone
Ben al to-hewe & stikid at the bord
But it were only dame custaunce a-lone
Line 431
This olde soudanesse cursede crone
Hath with here frendis don this curssede dede
ffor sche here selue wolde at the cuntre lede
Line 434
Ne þere was surreyn non that was conuertid
That of the conseyl of the soudon wot
That he was hewe er that he a-sterted
And custaunce han they take a-non fot hot
Line 438
And in a schip al stereles god wot
They han hire set & bidde hire lerne sayle
Out of surrie a-geyn ward to ytayle
Line 441
