And kenelynge thankyth here of þat requeste
So glad he was he nyste what to seye
Sche kyste here sone / & hom sche goth here weye
Line 385
[PART II.]
Aryuede ben these crystene men to londe
In surrey with a gret solempne route
And hastiliche þis soudan sente hese sonde
ffyrst to hese modir & al hese regne a-boute
Line 389
And seyde hese wyf was comyn out of doute
And preyede hire to ryde a-ȝen þe quene
The honour of hese regne to sustene
Line 392
Gret was þe pres & riche was tharay
Of surreynys & romeynys met in fere
The modyr of the soudan ryche & gay
Receyuyth hire with also glad a chere
Line 396
As any modir myȝte hire douȝtyr dere
And to þe nexte sete þere be syde
A softe pas solempnely þey ryde
Line 399
Noght trowe I þe triumphe of Iulius
Of which þat lucan makyth swich a bost
Was royallere ne more curyous
þan was thasemble of þis blysful ost
Line 403
But þis scorpioun þis wekede gost
The soudonesse for al hyre flaterynge
Caste vndyr this ful mortali to stynge
Line 406
The soudan comyth hym self sone aftyr this
So royali þat wondir is to telle
He wolcomyth hire with al ioye & blys
And þus in merthe & ioye I lete hem dwelle
Line 410
