We schul fyrst feyne vs cristene-dam to take
Cold watyr schal nat greue vs but a lite
And I schal swich a feste & reuel make
That as I trowe I schal the soudon quyte
Line 354
ffor thow hese wyf be crystenede neuere so whyte
Sche schal han neede to wasche a-wey the reede
Thow sche a funt ful of watyr with here leede
Line 357
O soudonesse roote of iniquite
Virago thow semiame the secunde
O serpent vndyr femynynyte
Lyk to the serpent deepe in helle I-bounde
Line 361
O feynede woman al that may conffounde
Vertu & innocence thour thyn maleyce
Is bred in þe / as nest in euery vice
Line 364
O satan enuyous syn thilke day
That þou were chasede þour oure erytage
Wel knowyst þou to wemen þe elde way
Thow madist eua brynge vs in seruage
Line 368
Thow wilt for-don this cristene maryage
Thyn Instreument so weyleawey the whyle
Makyst þou of wemen wan þou wit begile
Line 371
This soudonesse whom I þus blame & warye
Let pryuyly hire conseyl gon here way
What schulde I in this tale lengere tarye
Sche rydith to þe soudan on a day
Line 375
And seyde he wolde receyue hire lay
And cristendom of prestis hondis fonge
Repentynge hire sche hethene was so longe
Line 378
Be-sekynge hem [[altered from here]] to don here þat honour [folio 199b]
That sche muste haue þe crystene folk to feste
To plesyn hem I wele don myn labour
The soudon seyth I wele don at ȝoure heste
Line 382
